„Þetta er eiginlega eins og stærðarinnar ættarmót bara...“: Saga Flæðareyrarhátíðarinnar og upplifun hátíðargesta af henni

Í þessari ritgerð verður fjallað um Flæðareyrarhátíðina, sem haldin hefur verið reglulega á Flæðareyri í Grunnavíkurhreppi hinum forna allt frá árinu 1969. Á fjögurra ára fresti, hvert hlaupár, hefur verið blásið til hátíðar í þessari eyðibyggð þar sem saman hafa komið gamlir Grunnvíkingar og afkomendur þeirra. Með árunum hefur barnfæddum Grunnvíkingum fækkað en afkomendur þeirra hafa haldið uppi merki hátíðarinnar og hefur fjöldi þeirra sótt hana á síðustu árum. Greint verður frá sögu Flæðareyrarhátíðarinnar ásamt því að kanna hvaða gildi hún hefur fyrir hátíðargesti. Notast var við eigindlegar rannsóknaraðferðir þar sem tekin voru viðtöl við fimm einstaklinga sem sótt hafa hátíðina og hafa tengsl við svæðið. Markmið rannsóknarinnar er að skýra ástæður þess að fjöldi fólks sem á annaðhvort æskuminningar úr Grunnavíkurhreppi eða á ættir að rekja þangað er reiðubúið að leggja á sig ferðalagið í þessa eyðibyggð og allt umstangið sem hátíðinni fylgir. Ásamt því er leitast hvaða þýðingu hátíðin og staðsetning hennar hefur fyrir að fólkið sem hana sækir. Helstu niðurstöður rannsóknarinnar eru þær að Flæðareyrarhátíðin hefur mikið gildi fyrir þá sem hana sækja en með því að mæta á hátíðina skapa hátíðargestir ákveðin tengsl við svæðið og fólkið. Þessi tengsl sem myndast eru dýrmæt og er hátíðin viðmælendum mínum mjög kær